Categories: Featured गुन्हे तंत्रज्ञान व्हायरल सामाजिक

दरमहिना ३५०० रूपये मिळवण्यासाठी ‘पंतप्रधान बेरोजगार भत्ता योजना २०२०’ साठी रजिस्ट्रेशन करताय… मग आधी ‘हे’ वाचा

पंतप्रधान बेरोजगार भत्ता योजना २०२० अंतर्गत दरमहिना ३,५०० रुपये मिळवण्याच्या लालसेपोटी आपण सोशल मेसेजिंग अॅपवर व्हायरल होणाऱ्या लिंकवर क्लिक कराल तर कदाचित तुमचेच बँक खाते रिकामे होईल. त्यामुळे फुकटात खात्यात पैसे जमा होतील या हव्यासापोटी अशा कोणत्याही लिंकवर क्लिक करू नका. अन्यथा स्वतःचेच खाते रिकामे करून घेण्याची वेळ आपल्यावर येईल.

  • सरकारी योजना शक्यतो .gov.in या डोमेन वर पहायला मिळतात. त्यामुळे लिंकमधील डोमेनची खात्री करा.
  • पंतप्रधान बेरोजगार भत्ता योजना २०२० हा संदेश स्मार्टफोनच्या सोशल मेसेजिंग अ‍ॅपवर व्हायरल होत आहे. संदेशात असे लिहिले आहे की या योजनेंतर्गत आपली नोंदणी करा. योजनेंतर्गत बेरोजगारांना दरमहा ३५०० रुपये देण्यात येणार आहेत. नोंदणीसाठी अर्ज विनामूल्य असल्याचे सांगितले जाते, दहावी उत्तीर्ण आणि वय १८ ते ४० पर्यंत विहित केलेले आहे. नोंदणीची अंतिम तारीख ५ एप्रिल २०२० आहे. नोंदणीसाठी  http://bit.ly/pradhanmantri-berozgaari-bhattaa-yojna किंवा http://bit.ly/pradhanmantrl-berojgar-bhatta-yojnaa या दुव्यावर क्लिक करण्यास सांगितले आहे.

पंतप्रधान बेरोजगारी भत्ता योजना २०२० अशी कोणतीही योजना केंद्र सरकारच्या वतीने चालवली जात नसून केवळ फसवणुकीच्या हेतूने अशा लिंक सोशल मिडीयावर व्हायरल केल्या जात आहेत. फसवणुक करणाऱ्यांना हे माहित आहे, की अनेक लोक हव्यासापोटी खातरजमा न करताच मेंढरासारखे एकामागोमाग एक लिंकवर क्लिक करतात, आणि हजारो लोकांना अशा प्रकारच्या लिंकही फॉरवर्ड करतात. या लिंकवर क्लिक केल्यास तुमच्या मोबाईल मधील महत्वाचा डाटा चोरी केला जातो. अथवा ईमेलसारख्या माध्यमातून तुमची महत्वाची माहिती चोरी होते. यामध्ये तुमचा आधार नंबर, पॅन नंबर, सोशल खात्यांचे पासवर्ड, मोबाइल फोनमध्ये असलेली महत्वाची माहिती, संकेतशब्द हे सर्व चोरी केले जाते. याचा वापर करून तुमच्या नावाने बोगस कर्जदेखील उचलले जाऊ शकते. अशी अनेक प्रकरणे उघडकीस देखील आलेली आहेत. 

  • या लिंकवर क्लिक केल्यास Earnwithkp हा ब्लॉग ओपन होत आहे. सदर लिंकवर क्लिक केल्यास ब्लॉगकर्त्याला Googel Adsense च्या माध्यमातूनही लाखो रूपयांची कमाई होत असते. त्यामुळे अशा फसव्या लिंक वर क्लिक करून स्वतःबरोबर लोकांचाही वेळ खर्च करणे चुकीचे आहे.

पंतप्रधान बेरोजगारी भत्ता योजना २०२० या स्किमबाबत सध्या सोशल मिडीयावर खूप मेसेज फॉरवर्ड होताना दिसत आहेत.  तसेच अनेक लोकांना या स्किम बद्दल अधिक माहिती जाणून घेण्याचीही इच्छा दिसून आलीय. परंतु या स्किमबाबत सरकारी अधिकांऱ्याकडून माहिती घेतली असता अशा प्रकारची कोणतीही योजना सध्याच्या घडीला तरी केंद्रसरकारकडून राबवली जात नसल्याचे स्पष्ट झाले आहे. 

Team Lokshahi News