Categories: प्रशासकीय

अखेर रेशनिंगच्या तक्रार आणि माहितीसाठी राज्यसरकारने सुरू केली हेल्पलाईन, थेट करा संपर्क

मुंबई।  राज्यात कोरोनाच्या पार्श्वभूमीवर राज्य सरकार स्वस्त धान्य दुकानांच्या माध्यमातून लोकांना धान्यपुरवठा करण्यासाठी प्रयत्नशिल आहे. परंतु याचा गैरफायदा घेत काहीजण काळाबाजार करण्याचाही प्रयत्न करत आहेत. राज्याच्या विविध ठिकाणावरून याबाबत तक्रारी येऊ लागल्याने अखेर राज्य सरकारने हेल्पलाईन सुविधा उपलब्ध करून दिली आहे. लोकशाही न्यूजने  यासंदर्भात तक्रारीची बातमी प्रसिध्द केली होती.

कोरोना साथरोग नियंत्रणासाठी लागू केलेल्या लॉकडाऊन कालावधीत राज्यात रेशनिंगसाठी हेल्पलाईन कार्यरत करण्यात आली आहे. जनतेने रेशनिंग संदर्भातील तक्रारी आणि माहिती मिळविण्यासाठी 1800224950 किंवा 1967 या नि:शुल्क हेल्पलाईन क्रमांकाचा वापर करावा, असे आवाहन अन्न व नागरी पुरवठा विभागाने केले आहे.

लॉकडाऊन कालावधीत शिधावस्तू उपलब्धतेचे सनियंत्रण करताना रेशनिंग हेल्पलाईन बाबतीत जनतेत जागरूकता निर्माण करण्याची गरज असल्याचे दिसून आले आहे.  रेशनिंग साठीच्या तक्रारीसाठी/रेशनिंगची माहिती मिळविण्यासाठी हेल्पलाईन क्रमांकाचा वापर करा किंवा ईमेल वा ऑनलाईन तक्रार प्रणालीचा वापर करून आपली तक्रार नोंदवा, असे आवाहन जनतेस करण्यात आले आहे.

राज्यस्तरीय हेल्पलाईन ही सकाळी १० ते संध्याकाळी ६ वाजेपर्यंत सुरु राहणार असून त्याचा हेल्पलाईन क्रमांक : 1800 22 4950/1967 (नि:शुल्क)आहे. अन्य हेल्पलाईन क्रमांक : 022- 23720582 / 23722970 / 23722483, ईमेल– helpline.mhpds@gov.inऑनलाइन तक्रार नोंदविण्यासाठी mahafood.gov.in या वेबसाईटवर ऑनलाइन तक्रार निवारण प्रणाली याचा वापर करा. तसेच मुंबई-ठाणे शिधावाटप क्षेत्र नियंत्रण कक्ष सुरु करण्यात आले असून हा कक्ष सकाळी ८ ते रात्री ८ वाजेपर्यंत सुरु राहील. त्याचा हेल्पलाईन क्रमांक – 022 22852814,ईमेल- dycor.ho.mum@gov.in असा आहे.

Team Lokshahi News