Categories: आरोग्य सामाजिक

कोल्हापुरात वैद्यकीय साहित्य खरेदीत बनवेगिरी; मुख्यमंत्र्याकडून चौकशीचे आदेश

कोल्हापूर | कोल्हापुरात कोरोनासाठीच्या वैद्यकीय साहित्य खरेदीत बनवेगिरी झाल्याचा धक्कादायक प्रकार समोर आला असून मुख्यमंत्री उद्धव ठाकरे यांनी या प्रकरणी चौकशीचे आदेश दिल्याची माहिती प्रजासत्ताक सामाजिक सेवा संस्थेचे अध्यक्ष दिलीप देसाई यांनी पत्रकार परिषदेत दिली आहे. 

कोरोना चाचणीसाठी लागणारे संच प्रमाणित दर्जाचे न घेता भलतेच संच घेतल्याचा धक्कादायक प्रकार बुधवारी येथे उघडकीस आला. प्रजासत्ताक सामाजिक सेवा संस्थेचे अध्यक्ष दिलीप देसाई यांनी पत्रकार परिषदेत या घोटाळ्यावर माहिती अधिकारात मिळालेल्या कागदपत्रासह भाष्य केले. देसाई यांनी उघडकीस आणलेल्या या घोटाळ्यावर मुख्यमंत्री उद्धव ठाकरे यांनी या प्रकरणी चौकशीचे आदेश दिल्याचे देसाई यांनी सांगितले.

दिलीप देसाई – अध्यक्ष, प्रजासत्ताक सामाजिक सेवा संस्था

कोल्हापूर जिल्हा परिषदेचे मुख्य कार्यकारी अधिकारी अमन मित्तल यांनी घशातील स्त्राव तपासणीचे सव्वा कोटी रुपयांचे १२४ संच खरेदी केले. ज्या संस्थेतून हे संच खरेदी केले त्याचा उत्पादन बॅच (वस्तू समुदाय) हा इंडियन कौन्सिल ऑफ मेडिकल रिसर्च या नवी दिल्लीतील संस्थेने प्रमाणित केलेला आहे. मात्र, प्रमाणित संचाऐवजी अप्रमाणित संचाचा वापर शहानिशा न करताच येथील राजर्षी छत्रपती शाहू महाराज शासकीय वैद्यकीय महाविद्यालयाच्या शेंडा पार्कमधील प्रयोगशाळेमध्ये झाल्याचे समोर आले आहे.

मान्यता नसलेल्या १२४ पैकी ७३ संचांचा वापर झाला आहे, असे माहिती अधिकारात वैद्यकीय महाविद्यालयाने कळवले आहे. त्यामध्ये ‘मिळता जुळता क्रमांक असलेले संच खरेदी केले आहेत’ असे मोघम उत्तर दिले आहे. मात्र, जो क्रमांक त्यांनी उल्लेख केलेला आहे तो मेडिकल कौन्सिलच्या यादीमध्ये प्रमाणित नसल्याचेही देसाई यांनी सांगितले आहे.

राज्यात कोरोनाची गंभीर स्थिती असताना आणि राज्यातील जनता संकटात सापडली असताना बनवेगिरीचे हे प्रकार घडत असल्याने याबाबत मुख्यमंत्री उद्धव ठाकरे यांच्याकडे तक्रार करण्यात आली होती. ठाकरे यांनी या निवेदनावर चौकशी करण्याचे आदेश दिले असून गृह राज्यमंत्री शंभूराजे देसाई यांनीही या प्रकाराची चौकशी करण्यात येईल असे बुधवारी येथे पत्रकारांना सांगितले आहे.

Team Lokshahi News