Categories: Featured

मोदी सरकार ‘किसान क्रेडीट कार्ड’व्दारे देतयं लाखो रूपयांचे ३ लाभ – जाणून घ्या सविस्तर

नवी दिल्ली। पंतप्रधान किसान सन्मान निधी योजनेंतर्गत शेतकऱ्यांनाविविध लाभ देण्याची तयारी केंद्रसरकारच्या वतीने सुरू झाली आहे. या योजनेत समाविष्ठ असणाऱ्या शेतकऱ्यांना आता किसान क्रेडिट कार्ड जारी करण्यासाठी १५ दिवसांचे विशेष अभियान सुरु करण्यात आले असून पुढील १५ दिवसात शेतकऱ्यांना किसान क्रेडिट कार्ड देण्याचे निर्देश बॅंकाना देण्यात आले आहेत. याबरोबररच यामाध्यमातून शेतकऱ्यांना २ लाख रूपयापर्यंतचे विमासंरक्षण आणि वार्षिक ६ हजार रूपयांचा सन्माननिधी प्रदान करण्यात येणार आहे. 

किसान क्रेडीट कार्डद्वारे आता शेतकऱ्यांना ३ लाख रुपयांपर्यंत कर्ज पीकांसाठी दिले जाईल. हे कर्ज ७ टक्के  व्याज दराने मिळेल. तसेच योग्य कालावधीत या कर्जाची परतफेड केल्यास शेतकऱ्यांना व्याजात ३ टक्के सवलतही दिली जाईल. त्यामुळे हे कर्ज शेतकऱ्यांना ४ टक्केच व्याजदाराने उपलब्ध होणार आहे. त्याचबरोबर विनातारण दिल्या जाणाऱ्या १ लाख रूपयांपर्यंतच्या कर्जमर्यादेतही वाढ करण्यात आली आहे. आता शेतकऱ्यांना १ लाख ६० हजार रूपयापर्यंत विनातारण कर्ज मिळणार आहे.

या अभियानासंदर्भाचे निर्देश सर्व राज्य, केंद्र शासित प्रदेश आणि सर्व बँकांचे प्रबंध निदेशक आणि नाबार्डच्या अध्यक्षांना जारी केले आहेत. ज्यात ‘केसीसी’ अंतर्गत पीएम किसान लाभार्थ्यांना समाविष्ठ करण्यासाठी विस्तृत विवरण दिले आहे. तसेच केसीसी न झालेल्या शेतकऱ्यांच्या नावाची यादीही तयार करण्यास सांगितले आहे. 

सर्व लाभार्थ्यांना राज्य, केंद्र शासित प्रदेशाचे कृषि, पशुपालन, पंचायत आणि ग्रामीण विकास विभागासहित संबंधित विभाग आणि पंचायत सचिवांच्या माध्यमातून संपर्क साधण्याचे आदेश देण्यात आले आहेत.  तसेच एनआरएलएम योजनेंतर्गत बँक सखीचा उपयोग पीएम किसान लाभार्थ्यांना प्रेरित करण्यासाठी केला जाईल जेणे करुन ते या उद्देशाने संबंधित शेतकरी बँक शाखांमध्ये जातील. केसीसीसोबत आता व्याज दरातील सुविधा पशुपालन आणि मत्स्य पालन करणाऱ्या शेतकऱ्यांना देखील दिली जाणार आहे. राज्य आणि केंद्रशासित प्रदेशांना सरकारने विनंती केली आहे की त्यांनी शेतकऱ्यांवर लक्ष केंद्रीत करावे आणि त्यांच्यासाठी अतिरिक्त केसीसी जारी करण्याची परवानगी द्यावी.

ज्या शेतकऱ्यांकडे पहिल्यापासूनच किसान क्रेडिट कार्ड आहे, त्यांना कर्जाचे लिमिट वाढवण्यात येईल. (विनातारण १ लाख रूपयावरून १ लाख ६० हजार रूपये). ज्या शेतकऱ्यांचे कार्ड निष्क्रिय आहे, ते आपल्या बँक शाखेत जाऊन आपले कार्ड अक्टिव्ह करु शकतात. तसेच ज्या शेतकऱ्यांकडे ही सुविधा नाही, ते शेतकरी आपल्या जमिनीचे दस्तावेज आणि पीकाची माहिती घेऊन बँक शाखेत जाऊन नवे कार्ड तयार करुन घेऊ शकतात.

मोदी सरकार किसान क्रेडीटव्दारे किती कर्ज देणार –

मोदी सरकारने दावा केला आहे की, लागोपाठ तीन वर्षांपासून शेतकीकर्ज हे निर्धारित लक्ष्यापेक्षा जास्त देण्यात येत आहे. यंदाच्या (२०२०-२१) अर्थसंकल्पात सरकारने हे लक्ष्य वाढवून १५ लाख कोटी रुपये केले आहे. याद्वारे सरकारचा उद्देश आहे की शेतकऱ्यांना सावकार अथवा जमीनदारांकडून कर्ज घेण्याची वेळ येणार नाही. त्यांनी सरकारी संस्थांकडून कर्ज घ्यावे.

PM Kisan योजनेच्या लाभार्थ्यांना Kisan Credit Cardच्या माध्यमातून तीन खास सुविधा –
  • ६००० रुपये वर्षाला
  • किसान क्रेडिट कार्ड बनवून देणे.
  • सुरक्षा विमा योजनेचा फायदा शेतकरी सहज घेऊ शकतील. या योजनेतंर्गत १२ आणि ३३० रुपयात २ लाख रुपयांचा अपघाती आणि जीवन विमा मिळेल.
किसान क्रेडीट कार्डसाठी फक्त एक पानी सोपा अर्ज –
  • एका पानाचा एक सोपा अर्ज तयार केला गेला आहे, ज्याव्दारे शेतकऱ्यांकडून बँकेच्या रेकॉर्डमध्ये मूळ डाटा प्राप्त केला जाईल आणि फक्त पिकांच्या पेरणीचे विवरण आणि जमीनीचे रेकॉर्ड याची एक प्रतिलिपी भरून घेतली जाईल.
  • या अर्जाचा नमुवा सर्व वर्तमान पत्रात देण्यात येईल. जेणेकरून लाभार्थ्यांना या अर्जाच्या कात्रणाच्या माध्यमातून अर्ज भरता येईल.
  • हा अर्ज www.agricoop.gov.in आणि www.pmkisan.gov.in पोर्टलवरुनही डाऊनलोड करता येईल.
  • कॉमन सर्विस सेंटरमध्ये देखील हा अर्ज भरणे आणि संबंधित बँक शाखेत पाठवण्याची व्यवस्था केली गेली आहे.

सर्व बँकांना हे अर्ज जमा करुन घेण्याची व्यवस्था करण्याच्या खास सूचना करण्यात आल्या आहेत, आणि अर्ज केल्याच्या तारखेनंतर १४ दिवसांच्या आता नवे केसीसी देणे किंवा सध्याच्या केसीसीची मर्यादा वाढवणे किंवा बंद केसीसी पुन्हा सुरु करणे बंधनकारक करण्यात आले आहे. याची देखरेख राज्य आणि केंद्र शासित प्रदेशांकडून केली जाईल. तसेच याचे काम डीडीएम, नाबार्डच्या संपूर्ण सहयोगात जिल्हा कलेक्टर यांचेमार्फत केले जाईल.

किसान क्रेडीट कार्डव्दारे विमा संरक्षण योजनेचाही मिळणार लाभ –

केसीसी शिवाय पीएम किसान लाभार्थी तसेच पात्र शेतकऱ्यांची सहमती मिळाल्यानंतर सामाजिक सुरक्षा प्रदान करण्याच्या उद्देशाने पंतप्रधान सुरक्षा विमा योजना आणि पंतप्रधान जीवन ज्योती योजनेसाठी नामांकित केले जाईल. या योजनेंतर्गत २ लाखांचा विमा क्रमश: १२ रुपये आणि ३३० रुपयांच्या प्रिमियमने अपघात आणि जीवन विमा म्हणून शेतकऱ्यांना प्रदान केला जाईल.

Team Lokshahi News

Share
Published by
Team Lokshahi News
Tags: agriculture loan bank loan scheme crop insurance farm insurance Farmer loan waiver Scheme insurance policy Kisan credit card Kisan credit card link to PM Kisan Scheme mahatma phule farmer loan waiver scheme pm Kisan scheme PM किसान निधी योजना किसान क्रेडीट कार्ड लिंक पंतप्रधान किसान सन्मान निधी योजना महात्मा जोतिराव फुले शेतकरी कर्जमुक्ती योजना महाविकास आघाडी शेतकरी कर्जमुक्ती योजना शेतकरी कर्जमाफी योजना शेतकरी कर्जमुक्ती योजना