Categories: Featured

भारतातून दिसणारं आजचं सूर्यग्रहण का आहे वेगळं?

मुंबई।२६ डिसेंबर।आज २६ डिसेंबरला तुम्ही दक्षिण भारतात असाल, तर तुम्हाला एक विलोभनीय दृश्य पाहायला मिळू शकतं. या दिवशी सकाळी कंकणाकृती सूर्यग्रहण पाहण्याचा दुर्मिळ योगायोग तुम्ही साधू शकाल. अमावस्येला सूर्य, पृथ्वी आणि त्यांच्या मध्ये चंद्र एका सरळ रेषेत येतात, तेव्हा चंद्रामागे सूर्य झाकला जातो. म्हणजे सूर्याला ग्रहण लागतं. पण हे कंकणाकृती सूर्यग्रहण म्हणजे नेमकं काय प्रकरण आहे? ते कुठून दिसणार आहे? तुम्हाला ते कसं पाहता येईल? हे जाणून घेण औत्सुक्याचे आहे. 

यंदाचं ग्रहण वेगळं का आहे?

एका वर्षात संपूर्ण पृथ्वीवरून किमान २ ते ५ सूर्यग्रहणं पाहता येतात. त्यातलं एखाद दुसरंच खग्रास ग्रहण असतं आणि तेही सगळ्याच देशांतून दिसत नाही. कंकणाकृती ग्रहण पाहण्याची संधी त्याहीपेक्षा दुर्मिळ असते. भारतातून याआधी १५ जानेवारी २०१० रोजी कंकणाकृती ग्रहण पहायला मिळालं होतं. दक्षिण भारतातल्या कन्याकुमारीजवळच्या परिसरातून तब्बल सात मिनिटं ग्रहणाची कंकणाकृती स्थिती अनुभवता आली होती. तर दुसरं आज पहायला मिळत आहे. यानंतरचं कंकणाकृती ग्रहण २१ जून २०१० रोजी उत्तर भारतातून दिसणार आहे. पण त्यानंतर पुढची अनेक वर्ष भारतातून कंकणाकृती ग्रहण दिसणार नाही. आज ग्रहण भारताच्या काही भागात कंकणाकृती तर काही भागात खंडग्रास ग्रहण स्वरूपात पहायला मिळत आहे. त्यामुळेही ते वेगळं आहे. 

यंदाचं कंकणाकृती ग्रहण कुठे पाहायला मिळेल?

कंकणाकृती ग्रहणात चंद्राच्या थेट छायेखाली असलेल्या प्रदेशातच ‘ring of fire’ दिसून येते. तर त्याच्या आसपासच्या प्रदेशात खंडग्रास ग्रहण पाहायला मिळतं. २६ डिसेंबर २०१९ रोजी दक्षिण भारताच्या काही भागातून हे कंकणाकृती ग्रहण दिसणार आहे. कर्नाटकातील मंगळुरू, केरळमधील कालिकत (कोझिकोड) ते तमिनाडूतील कोईंबटूर, डिंडिगुल, आणि श्रीलंकेतील जाफना या पट्ट्यात कंकणाकृती ग्रहण दिसणार आहे. साधारण दोन ते तीन मिनिटं ही कंकणाकृती स्थिती राहील. तर भारताच्या बाकीच्या बहुतांश भागात खंडग्रास स्थितीत ग्रहण पाहायला मिळेल. मुंबईसह महाराष्ट्रातूनही साधारण ८० टक्के सूर्य झाकला गेलेला पाहायला मिळेल.

आजची ग्रहण पाहण्याची वेळ काय?

आज २६ डिसेंबरला भारतातून सकाळी सुमारे आठ ते अकरा या वेळेत ग्रहण पाहता येईल. कालिकत ते कोईंबतूरदरम्यान सकाळी सुमारे ९ वाजून २७ मिनिटांनी पूर्ण कंकणाकृती स्थिती दिसेल. इतर ठिकाणी स्थानिक वेळेनुसार थोडा फरक पडू शकतो. मुंबईत खंडग्रास ग्रहण दिसणार असून सकाळी ८ वाजून चार मिनिटांनी ग्रहणाची सुरूवात होईल. ग्रहणाचा मध्य म्हणजे सर्वोच्च खंडग्रास स्थिती ९ वाजून २२ मिनिटांनी दिसेल. तर १० वाजून ५५ मिनिटापर्यंत ग्रहण संपलेले पहायला मिळेल.

कंकणाकृती सूर्यग्रहण म्हणजे काय?

आपण शाळेत शिकल्याप्रमाणे ग्रहण ही तीन प्रकारची असतात. खग्रास, खंडग्रास आणि कंकणाकृती. ग्रहणाच्या स्थितीत सूर्य, चंद्र आणि पृथ्वीमधलं अंतर किती आहे? ते नेमके सरळ रेषेत आहेत का? आणि तुम्ही पृथ्वीवर नेमके कुठे आहात? या तीन गोष्टींवर ग्रहणाचा प्रकार अवलंबून असतो. पृथ्वीवरून पाहताना सूर्य पूर्णपणे झाकला जातो त्याला ‘खग्रास सूर्यग्रहण’ असं म्हणतात. सूर्याचा केवळ काही भाग झाकलेला दिसतो, त्याला ‘खंडग्रास सूर्यग्रहण’ असं म्हणतात. एरवी चंद्र सूर्यापेक्षा, अगदी पृथ्वीपेक्षाही खूपच लहान आहे. पण तो पृथ्वीपासून जवळ आहे. त्यामुळं पृथ्वीवरून पाहताना आपल्याला सूर्य आणि चंद्र आकारानं एकसारखे दिसतात. आणि म्हणूनच खग्रास स्थितीत चंद्राचं बिंब सूर्यबिंबाला पूर्णपणे झाकू शकतं.

पण पृथ्वी आणि चंद्राच्या कक्षा काहीशा लंबगोलाकार आहेत. चंद्र या कक्षेत पृथ्वीपासून दूरच्या बिंदूजवळ असतो, अशा वेळी पृथ्वीवरून चंद्रबिंबाचा आकार सूर्यबिंबापेक्षा लहान दिसतो. याचदरम्यान जेव्हा सूर्यग्रहण होतं, तेव्हा चंद्र सूर्यबिंबाच्या मधोमध येतो; पण सूर्य पूर्णपणे झाकला जात नाही, तर एखाद कंकणासारखी म्हणजे बांगडीसारखी सूर्याची कडा दिसून येते. त्यालाच ‘कंकणाकृती सूर्यग्रहण’ म्हणतात. सूर्याच्या या स्थितीला खगोलप्रेमींनी ‘Ring of Fire’, अग्निवलय, अग्निकंकण अशीही नावं दिली आहेत.

ग्रहण पाहताना कोणती काळजी घ्यावी?

ग्रहण पाहताना कधीही सूर्याकडे थेट पाहू नका. कारण सूर्याच्या तीव्र कीरणांमुळे डोळ्यांवर परिणाम होऊ शकतो. ग्रहण पाहण्यासाठीचे खास फिल्टर लावलेले चष्मे घालूनच ग्रहण पाहावे. पिनहोल कॅमेरा, घरातली चाळणी किंवा सौर दुर्बिणीच्या माध्यमातून सूर्याचं प्रतिबिंब एखाद्या पडद्यावर पाडून ग्रहणाची स्थिती पाहता येते. पिनहोल कॅमेरा कसा तयार करायचा, त्याची माहिती इथे पाहू शकता. तुमच्या शहरात किंवा शाळेत एखादं विज्ञानकेंद्र असेल तर तिथे अनेकदा ग्रहण पाहण्यासाठी विशेष सोय केलेली असेल. त्याविषयीची माहिती घ्या.

गैरसमज बाजूला सारून ग्रहणाचा आनंद घ्या

ग्रहणाविषयी आपल्याकडे खूप गैरसमज आणि अंधश्रद्धा आहेत. राहू- केतू हे राक्षस सूर्याला गिळतात म्हणून सूर्यग्रहण होतं असं लोकांना पूर्वी वाटायचं. ग्रहणात हवा, पाणी अन्नपदार्थ दूषित होतात असा एक मोठा गैरसमज होता. त्यामुळं पूर्वी ग्रहण सुटल्यावर लोक आंघोळ करीत असत, साठवलेले सर्व पाणी ओतून टाकीत व नव्याने पाणी भरत असत.

पण अशा प्रथा चुकीच्या असल्याचं पंचांगकर्ते दा. कृ. सोमण सांगतात, “ग्रहण सुटले म्हणून आंघोळ करण्याची काहीही आवश्यकता नाही. कारण ग्रहणात काहीही अशुद्ध होत नाही. ग्रहणात जेवू नये, ग्रहणात झोपू नये, ग्रहणात मलमूत्र विसर्जन करू नये असेही सांगितले जाते. परंतु त्यात काहीही तथ्य नाही. काही लोक मला प्रश्न विचारतात की, आमच्या राशीला हे ग्रहण कसे आहे ? मी त्यांना सांगतो, की जे लोक ग्रहण पाहतील, त्यामागचे वैज्ञानिक कारण समजून घेतील त्यांच्या राशीला हे ग्रहण शुभ आहे.”

सौजन्य BBC मराठी

Team Lokshahi News

Share
Published by
Team Lokshahi News
Tags: कंकणाकृती सूर्यग्रहण खग्रास सूर्यग्रहण खंडग्रास सूर्यग्रहण चंद्र पृथ्वी भारतातून दिसणारे सूर्यग्रहण सूर्य सूर्यग्रहण